20:16 12-09-2019
Mozilla կազմակերպությունը թողարկել է Firefox-ի առաջին տարբերակը, որում ներկառուցված է ինտերնետ-ակտիվության լրտեսումից պաշտպանող սարք։ Enhanced Tracking Protection (ETP) հակատրեքինգային համակարգը, որն առկա է բրաուզերի 69-րդ տարբերակում, պաշտպանում է ինչպես անցանկալի cookie-ֆայլերից, այնպես էլ կրիպտոարժույթների թաքնված մայնինգից, հայտնում է «Վեստի»-ն։
Ինտերնետային գաղտնալսող սարքերի ցանկերը ETP-ին տրամադրում է Disconnect.me ծառայությունը։ Սեղմելով հասցեի տողի մոտ վահանով նշանը՝ կարելի է նայել, թե ինչն է արգելափակված։ Firefox 69-ը հասանելի է Windows-ում, Apple-ի համակարգիչներում, Linux եւ Android սարքերում։
Նախկինում ETP-ն կարող էր աշխատել միայն ինկոգնիտո ռեժիմում։ Այս տարվա հունիսից համակարգն ինքնաբերաբար ակտիվանում է Firefox-ն առաջին անգամ ներբեռնող օգտատերերի մոտ։
Firefox-ի նոր տարբերակը նաեւ պաշտպանում է թվային մատնահետքերի հավաքումից (ֆինգերպրինտինգ)։ Այդ յուրատեսակ հետքերը մնում են վեբ-սեանսների ընթացքում, եւ դրանցով մարքեթինգային ու գովազդային ընկերությունները կարող են նույնականացնել մարդուն եւ վերլուծել նրա վարքագիծը։ Google-ում, օրինակ, այդ մոտեցումը ոչ ճիշտ են համարում՝ պնդելով, որ կույր արգելափակումը կարող է առաջացնել անկանխատեսելի հանգամանքներ եւ խախտել կայքի գործունեությունը, իսկ դրա ստեղծողներին՝ զրկել աշխատավարձից։ Ըստ որոնման համակարգի, որոշակի տվյալների հավաքագրումը պետք է թույլատրվի, սակայն չափավոր ծավալներով։
Բացի այդ Firefox 69-ը ունի նաեւ այլ բարելավումներ, մասնավորապես՝ ցանկացած տեսանյութի ավտոմատ միացումն արգելափակելու հնարավորություն։ Նոր Windows համակարգիչներում բրաուզերի այս տարբերակը ավելի արագ է աշխատում։
Աղբյուրը՝ https://news.am/arm/news/531769.html