17:37 18-04-2020
«Facebook Inc-ը հրաժարվել է 50 և ավելի մարդկանց մասնակցությամբ պլանավորված բոլոր միջոցառումներից մինչև 2021 թվականի հունիսի վերջը։ «Ինտերֆաքս»-ի փոխանցմամբ, սոցցանցի իր էջում ասել է ընկերության հիմնադիր և ղեկավար Մարկ Ցուկերբերգը:
Ցուկերբերգը որոշումը կայացրել է առողջապահության ոլորտում փորձագետների առաջարկություններից ելնելով:
Նա նաև նշել է, որ Facebook-ի աշխատակիցների մեծ մասը կշարունակի հեռավար աշխատել առնվազն մինչև մայիսի վերջ: Բացառություններ կլինեն այն մասնագետների համար, ովքեր չեն կարող տանից աշխատել՝ ներառյալ ապօրինի գործողությունների կանխարգելման որոշ ինժեներներ և մոդերատորներ:
Աշխատակիցները, ովքեր ինչ-ինչ պատճառներով կցանկանան շարունակել աշխատել հեռակա կարգով՝ մինչև ամառվա վերջ կունենան այդ հնարավորությունը:
Բացի այդ, Facebook-ը մինչև հունիսի վերջ երկարաձգել է գործուղումների արգելքը:
«Խոշոր տեխնոլոգիական ընկերություններն առաջիններից էին, որոնք իրենց աշխատակիցներին ուղարկում էին հեռավար աշխատանքի»,- նշում է The Wall Street Journal-ը:
Մարտին Facebook-ը խորհուրդ տվեց, որ իր աշխատակիցները հնարավորության սահմաններում մնան տանը: Amazon-ի, Google-ի և Alphabet Inc.-ի անդամ այլ ընկերությունների հանդիպումները ևս հետաձգվել կամ չեղյալ են հայտարարվել համաճարակի պատճառով:
Ֆեյսբուքում կա մոտավորապես 45,000 աշխատակից, որոնց մեծ մասը աշխատում է Կալիֆոռնիայում գտնվող ընկերության Մենլո-պարկ կենտրոնակայանում: Facebook-ը նաև ներգրավում է մոտ 15 հազար վարձու աշխատող՝ իր պլատֆորմում մոդարատորության համար: